Dre zomanioù e vez studiet ar yezh gant ar greizenn dermenadurezh. Skoueriekaat an implij anezhi eo ar pal. Skignañ a ra embannadurioù a denn d'he labourioù a-benn ledanaat implij an termenoù erbedet. Evit respont d'ur goulenn resis e studier an domani-mañ-domani bep gwech. E-touez an domanioù a vez pledet ganto, e reer da gentañ-penn war-dro ar re vallusañ e-keñver ar goulenn zo er gevredigezh : re ar vuhez pemdez. Labourat a ra TermBret e darempred gant tud a vicher a bleustr an domanioù studiet.

Ur c'havlec'h emgefreet eo, ennañ fichennoù zo bet lakaet warno, hervez ur protokol resis, roadennoù termenadurezh (termen studiet, termenadur, domani, displegadennoù yezhadurel, termenoù kevatal er yezhoù estren). Memor TermBret an hini eo, ennañ an holl labourioù bet kaset da benn gant TermBret abaoe m'eo bet krouet. Kavet e vo termenoù kinniget ha termenoù skoueriekaet. Ingal e vez bouetaet an diaz-se. Ennañ 42.000 fichenn ha tu zo furchal enno diwar lec'hienn Genrouedad Ofis ar Brezhoneg war pajenn TermOfis.

En em silet eo an teknologiezhioù nevez en hor buhez pemdez evit al labour pe an dudi. Kemer a ra perzh ar brezhoneg en emdroadur-se a zo mil pouezus evit e zazont. Da skouer, gant tost da 30.000 pennad, ez eo ar brezhoneg ar yezh keltiek kentañ war Wikipedia ha liesseurt eo ar binvioù brezhonek bremañ (meziantoù, lec'hiennoù Kenrouedad, enepviruzoù, luskerioù enklask...). Abaoe pell e labour an Ofis war an dachenn-se a-benn kinnig ostilhoù azas d'ar vrezhonegerien ha divizet en deus en ober muioc'h c'hoazh. Se zo kaoz e oa bet sinet ur c'hendivizad e 2007 etre Microsoft, Kuzul-rannvro Breizh hag Ofis ar Brezhoneg.

Kement den ha kement ensavadur zo : strollegezhioù lec'hel, embregerezhioù, kevredigezhioù, troerien, hiniennoù. Gallout a reont kas dimp testennoù da adlenn evit gwiriañ ar gerioù implijet, pe testennoù da dreiñ. Kas a reont listennadoù termenoù evit gouzout penaos e vezont lavaret e brezhoneg, pe evit gwiriañ erbedadennoù ar greizenn dermenadurezh.

Evit gouzout hiroc'h :

Termbret

Termbret a c'hoarvez eus ur sekretourva hag a labour dorn-ha-dorn gant ar Servij Treiñ, hag eus izili a-youl-vat en em dolp e bodadoù termenadurezh. War-lerc'h e vez diskouezet al labourioù bet kaset da benn d'ar C'huzul Skiantel a-benn kaout e ali. A-benn ar fin e vez embannet an disoc'hoù e stumm geriaouegoù a denn d'an danvez-mañ-danvez.

Digor eo ar bodadoù da gement brezhoneger en deus c'hoant skoazellañ al labour termenadurezh. Ezel eo TermBret eus Kevredigezh Europat an Dermenadurezh hag eus Kevredad Frañs an Dermenadurezh.

Mont e darempred gant ar sekretourva :

Termbret