Liesseurt eo an danvezioù enklask ha tennañ a reont d'an holl dachennoù ret-holl da gendalc'h ha da ziorroadur reizh ur yezh kehentiñ modern e kornôg Europa : an treuzkas a remziad da remziad, statud lezennel ar yezh hag he implij er vuhez foran gant ar galloudoù kevredik, an deskadurezh divyezhek, ar mediaoù, an embann, ar vuhez relijiel, ar sport, ar sevenadur, ar vuhez armerzhel.

Servij an Arsellva a ra ar poent, pemp bloaz goude e zanevell hollek kentañ (Un dazont evit ar brezhoneg ?, 2002), en ur embann un eil danevell hollek, Ar brezhoneg e-kreiz ar roudour / La langue bretonne à la croisée des chemins.
Tri bloavezh labour zo bet gouestlet da studiañ pizh stad ar brezhoneg war pep tachenn. Taolet ez eus bet ar brasañ evezh ouzh an emdroadurioù diwezhañ hag ouzh dibarderioù broioù Breizh. Troet eo ivez an teul-mañ war-zu skouerioù talvoudus en diavaez eus Breizh koulz ha war an emdroadurioù a c'heller gortoz en dazont tost.
Un dra a c'hallomp merzout da gentañ : etre an div zanevell, n'eo ket cheñchet-krenn stad ar yezh. Digreskiñ a ra c'hoazh an niver a yezherien, ha n'a ket buan a-walc'h emdroadur an deskadurezh divyezhek (peurgetket) evit cheñch penn d'ar vazh. Setu eo kadarnaet stad nec'hus an traoù hor boa taolennet e 2002 dija. Un dra nevez ha pouezus-kenañ zo bet er bloavezhioù diwezhañ avat. Kreñvaet eo kalz emouestl politikel an aotrouniezhoù lec'hel. Daoust ma chom bihan a-walc'h an emdroadur-se c'hoazh, e laka goanag da ziwanañ. Setu n'eo ket tonket d'ar yezh mont war-gil da viken. Un hent all a c'hall bezañ c'hoazh, met o vezañ m'emaomp en ur c'hroashent, en deus ezhomm ar brezhoneg adalek bremañ eus emouestl mennet an holl evit sevel e gein.

Pellgargañ an danevell (9,29 Mo)