Servijoù Ofis ar Brezhoneg

Gant Arsellva implij ar yezhoù e vez dastumet ar roadennoù sokioyezhoniel ret-holl da gompren stad bremañ ar brezhoneg. Da c'houde e vez dielfennet ar roadennoù-se, ha skignet e vezont war-bouez un danevell hollek ha teuliadoù a denn da zanvez pe zanvez. An enklask-se a vez adlakaet war ar stern ingal. Reiñ a ra tu da sevel kinnigoù resis ha dereat a-benn lakaat politikerezhioù terkerezh yezhel e plas evit mad ar brezhoneg.

Labourat a ra ar Servij Treiñ evit obererien a-leizh e domanioù liesseurt-kaer (melestradurezh, urzhiataerezh, savouriezh, mererezh al lastez, sevenadur...). Teurel a ra evezh e ve implijet reizh ar yezh, ha kinnig a ra ur skoazell bad evit lakaat ar brezhoneg er vuhez foran dre guzuliañ an aozadurioù a-fet lennusted ha doare kinnig ar skridoù divyezhek. Gantañ e vez heuliet an teuliadoù penn-da-benn, betek adlenn an amprouennoù. Kinnig a ra ivez ur servij skoazellañ war an tomm, hag ez adlenn troidigezhioù pe testennoù deuet a-ziavaez d'an Ofis Publik.

An Ajañs Diorren zo he c'hefridi kas implij ar brezhoneg war-raok en holl gevrennoù eus ar gevredigezh. Harpañ a ra an dud en o raktresoù, ha dreist-holl atizañ ar strollegezhioù, an embregerezhioù hag ar c'hevredigezhioù da lakaat politikerezhioù yezhel divyezhek e plas. Aozañ a ra ivez koulzadoù termenet mat evit luskañ ha kizidikaat an dud. E 2001 en doa roet lañs an Ofis Publik d'ur c'houlzad hollek, Ya d'ar Brezhoneg e anv, gant ar pal tapout holl obererien ar gevredigezh e-barzh dazont ar yezh. Deuit e darempred ganeomp hep gortoz pelloc'h m'hoc'h eus ur raktres da zisplegañ dimp.

Ar servij-se zo e gefridi dastum, mirout ha skignañ glad ar brezhoneg dre gomz ha dre skrid. Kemer a ra preder dreist-holl da saveteiñ ha da skoueriekaat ar glad lec'hanvadurezh dibar zo e Breizh. Kenlabourat a ra gant an tiez-kêr evit sevel skriturioù reizh da anvioù-lec'h Breizh. Bemdez e vez hizivaet ur bank roadennoù lec'hanvadurezh, ennañ eilstummoù, stummoù kozh, distagadurioù treuzkrivet gant al lizherenneg fonetikel kenkoulz ha stumm skoueriekaet pep anv-lec'h. Gantañ eo bet savet ar gartenn-hent kentañ eus Breizh e brezhoneg.

TermBret, kreizenn dermenadurezh, a ambroug diorren rekis ar brezhoneg en domanioù nevez a zigor dirazañ (deskadurezh, kenwerzh hag ekonomiezh, mediaoù, melestradurezh, panellerezh, urzhiaterezh ha teknologiezhioù nevez) dre sevel geriaouegoù teknikel modern hag azas. Gant an Ofis Publik e vez skignet an termenoù-se hag aliet an aozadurioù a raio implij anezho.