Ar c'helenn d'an dud deuet

Kuzul-rannvro Breizh en deus kefridiet an Ofis da aozañ koulzadoù evit kas ar brezhoneg war-raok. Abaoe 2000 emañ e Ajañs Diorren e karg eus ur c'houlzad bloaziek zo e bal tizhout an oadourien. Evit se e vez skignet skritelloù bras a-ratozh evit an dud-se e rouedadoù ar c'humunioù hag an departamantoù da-geñver pep distro-skol, e pep lec'h e Breizh. An Ajañs Diorren a gemer perzh ivez e koulzadoù luskañ amañ hag ahont evel "Mizvezh ar Brezhoneg" evit al levrioù brezhonek. Kas ar brezhoneg war-raok a dalvez ivez bezañ ingal er saloñsoù arbennikaet hag er festivalioù. Kemer perzh a ra Ajañs Diorren an Ofis en "Emvod ar Gelted", e saloñsoù studierien evel hini "Azimut" e Brest pe e darvoudoù bras evel "Brest 2008". Engouestlet eo an Ofis e diorren ar c'helenn divyezhek ivez. Brudañ an hentad-se evit ma vo anavezet gwelloc'h eo hor pal. Savet ez eus bet un teul a-ratozh, "Kregiñ gant ar vuhez diouzh ar gwellañ", a skignomp en tiez-kêr, er magourioù hag er skolioù.

Ouzhpenn an oberiadennoù-se evit kas ar brezhoneg war-raok, emañ an Ajañs e karg eus ur c'houlzad zo e bal broudañ an dud eus ar gevredigezh keodedel d'ober gant ar brezhoneg. D'ar 5 a viz Here 2001 e oa bet roet lañs d'ar c'houlzad « Ya d'ar Brezhoneg ». Abaoe ez eus bet meur a gantad a aozadurioù o tont da gaout an emglev istorel-se, embregerezhioù evit an hanter anezho. Pal "Ya d'ar Brezhoneg" eo lakaat ar brezhoneg e-barzh mont en-dro pemdeziek an aozadurioù. Setu e ra an Ajañs war-dro ar sinerien hag o aliañ evit kas o raktresoù da benn. Gant "Ya d'ar Brezhoneg" ez eus bet graet araokadennoù bras dija, ken war tachenn ar c'hehentiñ, ar panellerezh, ken war hini ar stummadur micherel e brezhoneg, hag ivez war tachennoù a bouez bras evit dazont ar yezh (sportoù, labour, mediaoù).

Gant an Ofis e vez sinet ivez emglevioù kenlabour hag aliañ diwar-benn ar politikerezh yezhel gant kumunioù ha kuzulioù-departamant niverus a-benn o skoazellañ e kement domani zo (panellerezh, troidigezhioù, lec'hanvadurezh, deskadurezh, dudi) hag enframmañ pep ober en un argerzh hollek evit diorren an divyezhegezh. E 2005 ez eus bet divizet gant Ofis ar Brezhoneg digeriñ ar c'houlzad-mañ d'ar c'humunioù.

Kalz e pouez Ajañs Diorren an Ofis war frammañ kinnig ar c'helenn divyezhek, dreist-holl er skolioù kentañ derez, rak empleget eo an tiez-kêr el live kelenn-se. Kuzulioù a ro d'an dilennidi evit digeriñ klasoù pe skolioù da zeskiñ brezhoneg a-benn ma c'hello tud ar vugale dibab ar c'helenn divyezhek..