Bemdez e pinvidika Ofis ar Brezhoneg ar bankoù titouroù bet savet gantañ. Kinnig a ra an Ofis dafar yezhel talvoudus. Digor eo diazoù titouroù an Ofis d'an holl ha gallout a reer sellet outo enlinen evit netra.

TermOfis

Kinnig a ra TermOfis, bank roadennoù TermBret, anezhañ kreizenn dermenadurezh an Ofis, termenoù teknikel eus ar vuhez a-vremañ. An termenoù-se, alies, ne gaver ket anezho er geriadurioù yezh boutin. TermOfis hag a c'haller atersiñ enlinenn abaoe miz Meurzh 2006 en deus graet berzh bras peogwir e vez goulennataet ur wezh bep 4 munut, noz-deiz, a-hed ar bloaz. Talvoudus eo TermOfis evit an divrezhonegerien a fell dezho gouzout petra a dalvez termen pe dermen ha ken talvoudus all eo evit ar vrezhonegerien a fell dezho pinvidikaat o zamm geriaoueg pe o deus ezhomm skoazell a-benn kas da benn labourioù treiñ e brezhoneg.

KerOfis

Bremañ en deus divizet an Ofis digeriñ d'an dud e vank titouroù lec'hanvadurel, KerOfis. KerOfis emeur ouzh e sevel abaoe ar bloavezhioù 1990. Diwarnañ eo diazezet al labourioù a gas an Ofis da benn evit kinnig ur skritur reishoc'h d'an anvioù-lec'h brezhonek. E KerOfis e vo kavet titouroù diwar-benn lec'hiadur pep anv ha titouroù istorel ivez. Lec'hioù zo, ouzhpenn, a vo kavet ivez displegadurioù etimologel evito pa'z int bet studiet ganeomp diwar goulenn ar strollegezhioù hon eus labouret evito. Ur bank titouroù hep e bar eo KerOfis. Sur-mat e plijo d'an holl frioù-furch nay gant hon anvioù-lec'h, ha bez' eus anezho evel ma oar an holl. Servijout a raio d'an ensklaskerien ha d'an holl re a fell dezho skrivañ o chomlec'h e brezhoneg ivez.